Сар шинийн баярын дараахан УИХ-ын ээлжит бус чуулган хуралдаж, Монгол Улсын 2017 оны төсвийн тодотголыг хэлэлцэх сураг гарсан ч одоогоор УИХ-ын даргын зөвлөл хуралдаагүй байна.
УИХ-ын даргын зөвлөлийн хуралдаанаар ээлжит бус чуулганыг хэдий хугацаанд хуралдуулах талаар хэлэлцэх ёстой юм. Үүний дараа УИХ-ын дарга захирамж гаргаж, ээлжит бус чуулганы товыг зарлана.
Урьдчилсан байдлаар гуравдугаар сарын 6-нд ээлжит бус чуулган зарлан хуралдуулах сураг гарч байгаа.
УИХ-ын гишүүдийн хувьд ээлжит бус чуулган зарлахыг хүлээж буй аж. Маргааш өдөрт багтаан ээлжит бус чуулган зарлагдах болов уу гэсэн хүлээлт зарим гишүүнд байна.
Сар шинийн өмнө буюу хоёрдугаар сарын 23-нд Засгийн газар ээлжит бусаар хуралдаж, Монгол Улсын 2017 оны төсвийн тодотголыг хэлэлцэн, дэмжсэн.
Мөн дээрх төсвийн тодотголыг Засгийн газраас УИХ-д хэзээ өргөн барих нь тодорхойгүй байна. Маргаашийн дотор багтаан төсвийн тодотголыг өргөн барих чиг дуулдаж байна.
Төсвийн тодотголыг өргөн барьсны дараа УИХ-ын ээлжит бус чуулганыг хэзээ товлон зарлах нь тодорхой болно гэх мэдээллийг албаны хүмүүс мөн өглөө.
