Бөхийн төрлүүдийн насанд хүрэгчдийн Дэлхийн аварга шалгаруулах тэмцээн Унгарын Будапешт хотод өнөөдөр дөрөв дэх өдрөө үргэлжлэн явагдаж байна.
Өчигдөр эмэгтэй 65, 68, 72, 76 кг-ын жингийн урьдчилсан шатны барилдаанууд болж, хагас шигшээд өрсөлдөх бөхчүүд тодорлоо. Манай улсаас дөрвөн бөх барилдаж байгаагаас 72 кг-ын жинд О.Насанбурмаа хагас шигшээд үлдэж, улмаар мөнгөн медалийн болзол ханган финалд өрсөлдөх эрхийг авлаа.
Эмэгтэй 65 кг-ын жинд барилдаж байгаа Х.Болортуяа эхний тойрогт БНСУ-ын Хан Бит Лийг 6:2-оор ялсан ч Канадын Даниелле Лаппагед 10:0-оор ялагдлаа. Хэрвээ Лаппагед финалд шалгарвал манай бөхөд дагах барилдаан гарах юм.
О.Насанбурмаа ДАШТ-ээс гурван хүрэл медаль хүртээд байгаа. Түүний хувьд медалийн өнгөө хувиргаж, цаашлаад алтан медаль төлөө барилдахаар боллоо. Финалын барилдаан өнөөдөр болно.