ЭХЭМҮТ зайн анагаахын сүлжээгээр орон нутаг, бусад эрүүл мэндийн байгууллагад мэргэжил аргазүйн зөвлөгөө өгөх, сургалт явуулах олон жилийн туршлагатай билээ.

Энэ удаад тус төвийн 5 сэхээн амьдруулах эрчимт эмчилгээний тасаг (Нярай судлалын ЭЭТ, Нярайн ЭЭТ, Хүүхдийн ЭЭТ, Мэс заслын ЭЭТ, Эх барих эмэгтэйчүүдийн ЭЭТ) хоорондоо бодит цагийн теле-анагаахын хамгийн сүүлийн үеийн технологийг суурилуулж, холболтоо хийв.

Ингэснээр хүнд өвчтөний оношилгоо эмчилгээний асуудлыг хурдтай шийдвэрлэх боломж улам нэмэгдэв.

Энэхүү системийг ДЭМБ, ЭМЯ-ны дэмжлэг туслалцаатай хэрэгжүүлснийг халдварт цар тахлын үед ашиглалтанд орууллаа.

ДЭМБ-ын хөрөнгө оруулалтаар хийгдэж буй энэ төслийн хүрээнд УНТЭ, УХТЭ, УГТЭ, ХӨСҮТ, ГССҮТ, Цэргийн Төв Эмнэлэг, "Яармагийн 500 ортой Эх, нярай, эмэгтэйчүүдийн эмнэлгийн Эрчимт эмчилгээний тасгуудад энэхүү систем суурилагдсан бөгөөд дараа 7 хоногт хоорондоо холбогдох боломжтой болох юм.

Өнөөдөр ЭМ-ийн дэд сайд Ш.Анхмаа ЭХЭМҮТ-д ажиллаж, Хүүхдийн эрчимт эмчилгээний тасгийн үйл ажиллагаатай танилцах явцдаа шинэ системийн үйл ажиллагааг эхлүүлэв.