Ерөнхийлөгч У.Хүрэлсүх өнөөдөр Төрийн ордонд болсон нийт шүүгчийн чуулганд оролцож үг хэлсэн. Энэ үеэрээ НЗДТГ-ыг нүүлгэж, одоо байгаа Хангарьд ордонд Улсын Дээд шүүхийг нүүлгэн оруулах талаар чиглэл өгсөн талаараа хэлжээ.
Тэрбээр хэлсэн үгэндээ "Монгол Улсад өнөөдөр анхан болон давж заалдах шатны 116 шүүх, 41 тамгын газартайгаар 43 барилгад үйл ажиллагаа явуулж байна. Үүнээс 8 шүүхийн тамгын газар түрээсийн байранд үйл ажиллагаа явуулж байгаа. Төрийн тэргүүний хувьд УДШ-ийг төв талбайн баруун талд байрлан үйл ажиллагаагаа явуулаасай гэж хүсэж байна. Миний бие энэ талаар Засгийн газарт холбогдох чиглэлийг өгсөн, шийдэгдэнэ гэдэгт итгэж байна" гэв.
