БНСУ-ын Сөүл хотноо энэ сарын 21-нд зохион байгуулагдсан Олон Улсын Математикийн Шинжлэх Ухааны гуравдугаар тэмцээнд Монголын баг амжилттай оролцож 3 мөнгө, 1 хүрэл, 1 тусгай байрын шагнал хүртжээ. Энэхүү тэмцээнд БНСУ, Монгол, Хятад, Лаос, Швед, Филиппин, Америк, Киргизстан, Саудын Араб, Хонконг зэрэг 10 улсын 1056 сурагчид оролцсон бөгөөд Монголоос 20 сурагч оролцсоноос 5 нь шагналт байр эзэлжээ.
Олон Улсын Математикийн Шинжлэх Ухааны тэмцээн нь хүүхдүүдийн бүтээлч сэтгэлгээ, төсөөлөн бодох чадварыг сорьж, хөгжүүлэх зорилготой аж. Өнгөрсөн жилийн энэ тэмцээнд Монголоос 18 сурагч оролцож хоёр медаль, 3 тусгай байрын шагнал хүртэж байжээ.
Уралдаанд оролцсон сурагчид өчигдөр эх орондоо иржээ.
