МАН-ын даргын сонгуультай холбоотой эрх баригч намын удирдлагуудыг хооронд талцуулж, яс шидсэн мэдээллүүд цахим орчинд ихээр гарах болсон.

Ерөнхийлөгчийн хэвлэлийн төлөөлөгч Ө.Золбаяр "Монгол Улсын Ерөнхийлөгчийн зүгээс УИХ-ын даргад "Боль, болихгүй бол чамд хэрэг үүсгэнэ" гэдэг үг огт хэлээгүй гэдгийг хариуцлагатайгаар мэдэгдье" гэв.

Тэрбээр, "Өчигдөр нэр бүхий хэвлэлээр Монгол Улсын Ерөнхийлөгч УИХ-ын даргад хандаж хэлсэн үг гэх ноцтой мэдээлэл тарсан. Үүнийг тодруулж хэлбэл "Боль, болихгүй бол чамд хэрэг үүсгэнэ" гэж Ерөнхийлөгч УИХ даргад хандаж хэлсэн мэт агуулгатай мэдээлэл нийтлэгдсэн.

УИХ-ын дарга Д.Амарбаясгалан өөрийн цахим хуудсаар дамжуулан яригдаагүй зүйлийг ярьсан болгож, хэлээгүй зүйлийг хэлсэн мэт мэдээ нийтлэлүүд ихээр гарч байна гэж няцаажээ. Монгол Улсын Ерөнхийлөгчийн зүгээс ч тэр УИХ-ын даргад хандаж тийм үг огт хэлээгүй гэдгийг хариуцлагатайгаар мэдэгдье.

Дашрамд дурдахад гуравдагч, дөрөвдөгч этгээдүүд цахим орчинд мэдээллийг хөөсрүүлж, эв нэгдлийг алдагдуулах үйл ажиллагааг тасралтгүй зохион байгуулж байгааг анхаарна уу" гэв.