Дэлхий нийтээрээ жил бүрийн 12 дугаар сарын 01-ний өдрийг ХДХВ, ДОХ-ын асуудалд анхаарал хандуулах өдөр болгон тэмдэглэн өнгөрүүлдэг. 2025 оныг “Асуудлыг шийдье, ДОХ-ын эсрэг хариу арга хэмжээг сайжруулъя” уриан дор тэмдэглэн өнгөрүүлж байна.
Энэ жилийн ХДХВ, ДОХ-той тэмцэх өдрийг ЭМЯ, ДЭМБ, ХӨСҮТ, Сонгинохайрхан нэгдсэн эмнэлэг хамтран халдвараас урьдчилан сэргийлэхэд хүн бүрийн оролцоог нэмэгдүүлэхэд анхаарч нөлөөллийн өдөрлөг арга хэмжээг Нэгдсэн эмнэлэгт зохион байгууллаа.
“Асуудлыг шийдье, ДОХ-ын эсрэг хариу арга хэмжээг сайжруулъя” нөлөөллийн үйл ажиллагаанд Эрүүл мэндийн яамны БЗДХ/ХДХВ/ДОХ/Сүрьеэ, вируст гепатиттай тэмцэх бодлогын хэрэгжилтийн зохицуулалт хариуцсан ахлах мэргэжилтэн Ц.Ундрал, ДЭМБ-ын Монгол дахь суурин төлөөлөгч Сокарро Эскаланте, ДЭМБ-ын Монгол Улс дахь суурин төлөөлөгчийн газрын Халдварт болон Халдварт бус өвчний нэгдсэн хяналт хариуцсан мэргэжилтэн Шалала Ахмадова, ХӨСҮТ-ийн дэд захирал Б.Азжаргал, Нийслэлийн Эрүүл мэндийн газрын ахлах мэргэжилтэн А.Ербахыт, Сонгинохайрхан нэгдсэн эмнэлгийн дэд захирал Б.Баяндалай болон бусад албаны хүмүүс оролцлоо. Мөн СХД-ийн 105 дугаар сургуулийн 12 дугаар ангийн сурагч Б.Амин-Эрдэнэ оролцож үеийнхээ залуучуудад хандаж уриалга хүргэлээ.
ДЭМБ-ын суурин төлөөлөгч Соккарро Эскаланте өдөрлөгт оролцож хэлсэн үгэндээ: Бэлгийн замаар дамжих халдвар нь нийтийн эрүүл мэндийн халдварт өвчин учраас халдварыг бууруулахад залуучуудын оролцоо маш чухал болохыг онцолж байлаа.
Энэ удаагийн ХДХВ, ДОХ-ын эсрэг нэгдсэн арга хэмжээ өмнөх жилүүдээ бодвол хүн бүрийн оролцоог нэмэгдүүлэх, иргэдийн ойлголт, мэдлэгийг сайжруулах, нөлөөллийн үйл ажиллагаанд иргэдийг татан оролцуулах зорилго агуулгаараа онцлог болж байна. Монгол улсын хувьд ХДХВ-ийн халдварын анхны тохиолдол 1992 онд бүртгэгдсэнээс хойш өнөөг хүртэл нийт 424 хүн ХДХВ-ийн халдвартай нь оношлогдож, ХДХВ-ийн халдварын тархалтын тооцооллоор 2025 онд 694 хүн ХДХВ-ийн халдвартай амьдарч байх магадлалтай байна.
2021 онд НҮБ-ын Ерөнхий Ассамблей 95-95-95 зорилт буюу ХДХВ-ийн халдвартай хүмүүсийн 95 хувийг оношилж, 95 хувийг эмчилгээнд хамруулан, үүнээс 95 хувийнх нь вирусийн ачааллыг дарангуйлах зорилт баталсан.
Монгол улсын хувьд 95-95-95 зорилт:
- ХДХВ-ийн халдвартай гэдгээ мэддэг хүн 47%
- Ретровирусийн эмчилгээнд хамрагдсан 86%
- Вирусийн идэвх дарангуйлагдсан 94% байна.
Өдөрлөгт оролцсон зочид, төлөөлөгчид болон эмнэлгээр үйлчлүүлж буй иргэд ХДХВ, ДОХ-ын асуудалд анхаарал хандуулах өдөрт нэгдэж “Итгэлцлийн гарын үсгийг” зурлаа.
