“Милан-Кортина 2026” өвлийн олимпын XXV наадам ирэх бямба гарагт нээлтээ хийнэ. Итали улсад болж буй олимпын наадамд Монгол Улсаас гүйлтийн цанын хоёр, уулын цанын нэг тамирчин оролцох билээ. 

Монгол Улсын үндэсний шигшээ багийн тамирчин Батмөнхийн Ачбадрах, Энхбаярын Ариунтунгалаг нар өчигдрөөс Италийн Тесеро хотод олимпын цанын баазад бэлтгэлээ эхлүүлжээ. Манай тамирчдын уралдаан хоёрдугаар сарын 7-оос эхэлнэ.

Энэ жил 31 настай Б.Ачбадрах гурав дахь удаагаа цагаан олимпын наадамд уралдах гэж байна. Тэрээр “Пёнчан-2018”, “Бээжин-2022” өвлийн наадамд оролцсон билээ. Э.Ариунтунгалаг 29 насандаа анхны олимпын наадамд оролцох гэж байна. Тэрээр биатлон болон гүйлтийн цанаар хичээллэдэг юм.